اسلام آباد۔16مئی(اے پی پی) سپیکر قومی اسمبلی راجہ پرویز اشرف پارلیمنٹ لاجز دا دورہ کیتے ۔ایں موقع تے چیئرمین پبلک اکاؤنٹس کمیٹی (پی اے سی) نور عالم خان، قومی اسمبلی سیکرٹریٹ اتے سی ڈی اے دے اعلیٰ حکام وی موجود ہن۔ سپیکر قومی اسمبلی راجہ پرویز اشرف کوں پارلیمنٹ لاجز اچ زیر تعمیر اضافی فیملی سویٹ تے سی ڈی اے دی طرفوں بریفنگ ݙتی ڳئی ۔ سپیکر قومی اسمبلی نیو پارلیمنٹ لاجز دی تعمیر اچ لمبی تاخیر تے کاوڑ کیتی تے منصوبے اچ تاخیر دی تحقیقات کرݨ دی ہدایت کیتی ۔ سپیکر آکھیے نویں پارلیمنٹ لاجز دی تعمیر دا منصوبہ 2011 اچ شروع تھیا جیڑھا ہݨ تئیں مکمل نی تھی سڳیا ۔گزریل 13 سالاں توں منصوبے دی لاگت اچ کئی گنا ودھارا تھی چکیے ، منصوبے دی تعمیر اچ تاخیر دی وجہ توں ارکان پارلیمنٹ کوں رہائش دے سلسلے اچ مشکلات دا سامݨا کرݨا پوندا پئے ۔ پارلیمنٹ لاجز اچ اضافی فیملی سویٹ دا منصوبہ پہلے توں ہی ٻہوں تاخیر دا شکار تھئے ۔سپیکر قومی اسمبلی سی ڈی اے کوں منصوبہ وختی مکمل کرݨ دی ہدایت کیتی تے منصوبے دی تاخیر دے معاملات کوں زیر غور گھن آوݨ کیتے اعلیٰ سطحی مینٹنگ سݙݨ دا فیصلہ کیتے تے آکھیے میٹنگ اچ چیئر مین اتے ڈپٹی چیئرمین سینیٹ،ڈپٹی سپیکر قومی اسمبلی، چیئرمین پی اے سی، وزیر خزانہ تے وزیر پلاننگ اینڈ ڈیویلپمنٹ کوں سݙیا ویسی ۔
.jpg)
