ترکی دی اعلیٰ سطحی سٹریٹجک تعاون کونسل دے پنجویں اجلاس اچ شرکت کریسن وفاقی وزیراں تے اعلیٰ حکام تے مشتمل اعلیٰ سطحی وفد وی وزیراعظم دے نال ہوسی
اسلام آباد ۔ 21 فروری (اے پی پی) وزیراعظم محمد نواز شریف (اج) بدھ کوں ترکی دے 3 ڈینھ دے دورے تے روانہ تھیسن ۔ وزیر اعظم پاکستان ترکی دی اعلیٰ سطحی سٹریٹجک تعاون کونسل (ایچ ایل ایس سی سی) دے پنجویںاجلاس اچ شرکت کریسن۔ مختلف وفاقی وزیراں تے اعلیٰ حکام تے مشتمل اعلیٰ سطحی وفد وی وزیراعظم دے نال ہوسی۔ دورے دے دوران وزیراعظم مختلف ڈوطرفہ علاقائی اتے بین الاقوامی معاملات تے ترک قیادت دے نال وسیع تر مشاورت اتے تبادلہ خیال کریسن۔ وزیراعظم محمد نواز شریف ترک وزیراعظم بن علی یلدرم دے نال خمیس کوں انقرہ اچ پاک ترک اعلیٰ سطحی سٹریٹجک تعاون کونسل دے پنجویں اجلاس دی سانجھی صدارت کریسن ۔ پاک ترک اعلیٰ سطحی تعاون کونسل دا قیام 2009اچ ڈوہیں ملکاں چال اعلیٰ سیاسی سطح تے مشاورت سانگے فریم فرک عمل اچ لاتا گیا ۔ اے میکنزم ڈوطرفہ قیادت کو ںسٹریٹجک فوکس اتے رہنمائی فراہم کریندا ہے تے مستقبل سانگے ہک وژن ترتیب ڈیونڑ اچ معاونت کریندا ہے ۔ کونسل دے تحت 6 مشترکہ ورکنگ گروپس کم کریندے پے ہن جیں اچ تجارت، توانائی، بینکنگ اتے فنانس، مواصلات، ریلوے، تعلیم اتے ثقافت تے سیاحت دے شعبے شامل ہن۔ کونسل دے دسمبر 2010ئ، مئی 2012ئ، ستمبر 2013ءاتے فروری 2015ءاچ چار اجلاس تھی گے ہن ۔ آخری اجلاس 17 فروری 2015ءکوں اسلام آباد اچ تھیا ہئی ۔ کونسل دے فریم ورک دے تحت ڈوہیں ملکاں وچال 50 توں ودھ معاہدے اتے مفاہمت دیاں یادداشتاں کوں چھیکڑی شکل ڈتی گی ہے ۔ کونسل دے پنجویں اجلاس دے چھیکڑ تئیں ہک سانجھا اعلامیہ جاری کیتا ویسی ایں موقع تے کئی معاہدے اتے مفاہمتی یادداشتاں تے دستخط وی متوقع ہن۔ دورے دے دوران وزیراعظم محمد نواز شریف ترک صدر طیب اردوان نال وی ملاقات کریسن۔ وزیراعظم محمد نواز شریف 15 جولائی 2016کوں ترکی اچ ناکام بغاوت دے خلاف پاکستان دی حکومت اتے عوام ولوں یکجہتی اتے غیر متزلزل حمایت دے عزم دا اظہار کرنڑ سانگے پارلیمان دا دورہ وی کریسن۔ بغاوت دی رات ترک پارلیمان کوں بمباری دا نشانہ بنڑایا گیا ہئی۔ وزیراعظم محمد نواز شریف ترکی اچ جمہوریت دے دفاع سانگے اپنڑیاں جاناں دا نذرانہ پیش کرنڑ آلیں کوں خراج عقیدت وی پیش کریسن۔ وزیراعظم محمد نواز شریف دا دورہ ترکی اتے پاک ترک اعلیٰ سطحی سٹریٹجک تعاون کونسل دے پنجویں اجلاس اچ شرکت نال ڈوہیں برادر ملکاں وچال تاریخی اتے آزمودہ تعلقات کو ںمزید ودھارا ملسی تے ڈوہیں ملکاں وچال مختلف شعبیں اچ تعلقات بئے پکے تھی ویسن ۔
.jpg)
