اسلام آباد ۔ 12 مئی۔ قومی ہاکی ٹیم دے عظیم گول کیپر منصور احمد انتقال کر گئے، انہاں دی عمر 50 سال ہئی ۔ منصور احمد گزریل ترائے سالیں توں دل دے مرض اچ مبتلا ہن ۔ منصور احمد 7 جنوری 1968ءکوں کراچی اچ جمے ہن ، پی اے ایف انٹرکالج سرگودھا دے بعد ڈی جے سائنس کالج کراچی اچ تعلیم حاصل کیتی ۔ انہاں مجموعی طو رتے 338 میچ کھیڈے ، انہاں کوں ترائے واری اولمپک کھیڈنڑ دا اعزاز حاصل تھئے ۔ انہاں 1990ءاولمپک دی سلور میڈلسٹ ٹیم کیتے نمایاں کارکردگی ڈیکھائی ۔ مسلسل 3 واری عالمی کپ کھیڈنڑ دا اعزاز پاونڑآلے منصور احمد 1994ءدی عالمی کپ دی فاتح پاکستان ٹیم دا حصہ ریہے ۔ انہاں 10 واری چیمپئنز ٹرافی کھیڈی ،جڈانجو 1994ءدی چیمپئنز ٹرافی اچ گولڈ میڈل پاونڑآلی پاکستانی ٹیم دا حصہ ہن ، انھاں 3 واری ایشین گیمز کھیڈیاں ، 1990 بیجنگ ایشین گیمز دی گولڈ میڈلسٹ ٹیم دے رکن ہن ۔ انہاں مجموعی طور تے انٹرنیشنل ہاکی ٹورنامنٹس اچ 12 گولڈ اتے اتنے ہی سلور جڈانجو 8 برانز میڈلز حاصل کیتے ، 1998ءاچ حکومت پاکستان گراں قدر خدمات دے اعتراف اچ اولمپئن منصور احمد کوں صدارتی تمغہ حسن کارکردگی ڈتا۔ 1996ءاچ آل ایشین اسٹارز ہاکی ٹیم دے رکن وی ریہے، 1994ءاچ انہاں کوں ورلڈ الیون اچ شامل کیتا گیا۔ ایں سا ل ایف آئی ایچ منصور احمد کوں دنیا دا بہترین گول کیپر قرار ڈتا، او چار واری انٹرنیشنل ایونٹس اچ بہترین گول کیپرقرار پاتے ، بعد اچ انٹرنیشنل ہاکی توں ریٹائرمنٹ دے بعد او 2000ءاچ پاکستان جونیئر ہاکی ٹیم دے کوچ مقرر تھئے ، بعداچ 2010 اچ پی ایچ ایف دے ڈائریکٹر اکیڈمک وی ریہے۔ انہاں دے کولوں ہائی پرفارمنس کوچنگ ڈپلومہ وی ہئی ۔ منصور احمد کوں 2014ءاچ بنگلہ دیش دی قومی ہاکی ٹیم دا اسپیشلسٹ گول کیپنگ کوچ بنڑایا گیا۔ منصور احمد سماجی سرگرمیاں اچ سرگرم ریہے ، حکومت پاکستان تمباکو نوشی توں پرہیز دی مہم اچ انہاں کوں ایمبسیڈر مقرر کیتا، منصور احمد کوں 2015ءاچ امریکہ دے شہر لاس اینجلس اچ تھیونڑآلے اسپیشل اولمپکس اچ بطور مہمان مدعو کیتا گیا۔ او فیفا دے اسپیکر وی ریہے جڈانجو منصور احمد کوں 2022 اچ قطر دے شہر دوحا اچ تھیونڑآلے عالمی کپ فٹ بال ٹورنامنٹ کیتے سپیکر داوی اعزاز ڈتا گیا۔
