اسلام آباد۔15اکتوبر(اے پی پی):چیف جسٹس آف پاکستان اتے سپریم کورٹ دے جج صاحبان سابق چیف جسٹس بلوچستان ہائی کورٹ اتے وفاقی شرعی عدالت جسٹس محمد نور مسکانزئی دے قتل تے افسوس کریندے ہوئیں آکھیے جو او دھرتی دے ھک مخلص فرزند،عظیم محب وطن، دیانتدار،قابل اتے مہربان جج اتے ھک متقی انسان ہن ۔ہفتے کوں جاری بیان موجب مطابق چیف جسٹس آف پاکستان جسٹس عمر عطا بندیال اتے سپریم کورٹ آف پاکستان دے ٻئے ججاں آپݨے مشترکہ تعزیتی پیغام اچ آکھیے جو اساں سارے آپݨے پیارے بھرا جسٹس محمد نور مسکانزئی دے قتل توں ٻہوں ݙکھی ہن ۔ھک مسیت تے دہشت گردانہ حملے دا شکار تھیوݨ دے ناطے مقتول شہادت دا درجہ حاصل کیتے ، انہاں دعا کیتی جو اللہ تعالیٰ مرحوم دی روح کوں جنت الفردوس اچ جاہ ݙیوے تے انہاں دے لواحقین، بلوچستان ہائی کورٹ اتے وفاقی شرعی عدالت دے چیف جسٹس اتے ججاں، بلوچستان ہائی کورٹ بار دے عہدیداران اتے ارکان کوں صبر جمیل عطا فرماوے۔ ایسوسی ایشن اتے بار کونسلز دے نال نال صوبہ بلوچستان دی قانونی برادری کوں ایں ناقابل تلافی نقصان کوں برداشت کرݨ دی ہمت اتے توفیق عطا فرماوے۔انہاں آکھیے مرحوم دھرتی دے ھک مخلص فرزند،عظیم محب وطن، دیانتدار،قابل اتے مہربان جج تےھک متقی انسان ہن ۔ انہاں دے انتقال ساݙے کیتے ناقابل فراموش یاداں چھوڑئن جیڑھیاں جو ساݙی زندگی دا ھک قابل قدر خزانہ ہن ۔
